يا ديوان الصالحين ياديوان الصالحين
يا ديوان الصالحين انتخبوا يا مواطنين
قربوا يا ولاد الدشرة باه تسمعوا هاذ النشرة
راه ليوم كاين عشرة على الكرسي متنافسين
تسعة منهم كذابين طول العام امخبيين
كي يلحقوا ربع سنين يولو يبانوا كاملين
أولهم السي مقران ألي يشعل النيران
بين الخاوة والجيران ولينا متفرقين
والثانية لالة مليكة عضو قديمة فالسنديكة
كانت تلعب التشكتشيكة وكوارطها أموسخين
والثالث عندو الڤندورة أو يقلبها عند الدورة
ما حافظ آية لا سورة غير يخدع فالمومنين
والرابع بالقشابية قال من عائلة ثورية
أو أهلو كانو حركية يبيّعوا فالمجاهدين
والخامس بقالو شبر باه يدخل في لقبر
هكذاك مزال يڤابر كش ما بقاو مطنهين
والسادس جاي يرازي كيما ذاك هيتلر النازي
يدير بيكم " كرام آرازي " ولا تعشو معلقين
والسابع عندو فبريكا ورجع يدي الباقيين
اسرقهم وهرب لهيكا ففرانسا وفأميريكا
والثامن فالحق مرى لا حيا لا حشمة لا عورة
راها معولة ترد الدشرة طاي طاي وطاي فين
والتاسع تعرفوه ياك فكل عام تشوفوه
نتوما تقولولو تفوه يزيد يولّي مسلّمين
والعاشرمسكين حشيشة جا يحسنلكم لمعيشة
ايسموه السي بوكريشة صوّتوا عليه يا سامعين
يا ديوان الصالحين يا ديوان الصالحين
ياديوان الصالحين ارواحوا للسوق كاملين .
موضوع: الانتخابات 
السبت 21 أغسطس - 11:50